महत्वपूर्ण जानकारीः



हिजो–आज परेवामा बिभिन्न किसिमका रोगहरु देखिन थालेको साथीभाईको गुनासो छ । सेतो, हरियो छेर्ने, खानेकुरा ओकल्ने, झोक्राएर वस्ने, दाना नखाने र अन्ततः मर्ने र बाचेकाले पनि टाउको बटार्ने समस्या खासगरी आजकाल देखिएको छ । त्यसका लागि यी कुरामा ध्यान दिनुहोस् ।

१. तपाँईले जुकाको औषधि ख्वाउने गर्नु भएको छ ? छैन भने हरेक ३–३ महिनामा खान दिने गर्नुहोस् । Albendazole ले सबैखाले जुकालाई मार्छ । त्यस्तै Piperazine पनि जुका मात्र परेको बेला दिन सकिन्छ । जुकाको औषधि दिने समयमा कम्तिमा ३ दिन इमिनो केयर वा अन्य राम्रो मल्टिभिटामिन ख्वाइसकेपछि मात्र जुकाको औषधि ०.२५ मि.लि. प्रति परेवा दिने गर्नुहोस् र पछि पनि ५–७ दिन इमिनो केयर वा अन्य राम्रो मल्टिभिटामिन दिनुहोस् ।



२. हरेक २–२ महिनामा F1 भ्याक्सिन दिने गर्नुहोस् । यो भ्याक्सिन सम्भव भए प्रत्येक परेवाको आँखामा १–१ थोपा राखेर वा पानी प्यास लाग्ने बनाएर कति पानी खान्छ सो अड्कलेर पानीमा राखी १०–१५ मिनेट भित्र ख्वाउनुहोस् । यो भ्याक्सिन रानीखेत बिरुद्घ लगाईन्छ । रानीखेतको लागि R2B भ्याक्सिन पनि दिन सकिन्छ । यो भ्याक्सिन इन्जेक्सनबाट प्रत्येक परेबालाई ०.५ मि.लि. दिएपछि सो समय देखि १० महिना सम्म काम लाग्छ । यी भ्याक्सिनमा जिवित भाईरस नै हुने भएकाले ल्याउँदा आइस राखेर ल्याउनुपर्छ र सो आइस पग्लनु आगावै प्रयोग गर्नुपर्छ ।

याद दिनुहोस् : कुनैपनि भ्याक्सिन दिने समयमा ५–७ दिन इमिनो केयर वा अन्य राम्रो मल्टिभिटामिनको साथमा क्यालसियम दिएर मात्र भ्याक्सिन दिने गर्नुहोस् ।





सकेसम्म रोग लाग्न नदिनु नै राम्रो हो । तर रोग लागि सकेको अवस्थामा पनि त उपचार गर्नैपर्ने हुन्छ । रोग लागि सकेको अबस्थामा परेबाको लक्षण हेरेर औषधि दिनु पर्छ । सामान्य रुघाखोकी लागेको अवस्थामा क्याक–क्याक गर्ने गर्छ । यस्तो लक्षण बच्चाहरुमा मात्र देखिएको छ भने टेट्रासाइक्लिनले मात्र पनि काम गर्छ । तर कहिले काहिं यस्तै लक्षण अन्य भाइरल र ब्याक्टेरियल इन्फेक्सनको कारणले पनि हुन सक्छ । यस्तो अवस्थामा एक भन्दा बढि परेबामा एकै पटक वा पटक–पटक गरेर लक्षण देखिनुका साथै मर्न पनि सक्छ । त्यस्तो भएमा Aliseryl WS (Highly effective combination of broad-spectrum antibiotics and vitamins, Made in Holland) दिनु पर्ने हुन्छ । Aliseryl WS Prevention को लागि पनि दिन सकिन्छ । Prevention को लागि ३–५ दिन सम्म एक चौथाई चम्चा र बिरामी छ भने ५–७ दिन सम्म आधा चम्चा एक लिटर पानीमा मिलाएर दिनुहोस् ।



भाइरल, ब्याक्टेरियल इन्फेक्सन छिट्टै एकबाट अर्कोमा सर्न सक्छ । तसर्थ यस्ता रोग लागेको बेलामा भिर्कोन पाउडर प्रति २ लिटर पानी बराबर ५ ग्रामको दरले परेबालाई पर्ने गरेर तीनीहरु बस्ने ठाँउमा र वरपर स्प्रेयरले छर्कनुहोस् । धेरै बिरामी बढिरहेका छन् भने प्रति १ लिटर पानी एक चौथाई चिया चम्चा भिर्कोन पाउडर बढिमा ५ दिन खान दिनुहोस् ।



भाइरल, ब्याक्टेरियल इन्फेक्सन बाहेक रानीखेतको लक्षण देखिएको अवस्थाका साथै खटिरा आएको बेलामा पनि भिर्कोन पाउडर प्रयोग गर्न सकिन्छ ।



एन्टिवायोटिक दिईसकेपछि ७ दिन इमिनो केयर वा अन्य राम्रो मल्टिभिटामिन दिनुहोस् ।